Paah siida rinah kntbyaxan ka ruwan sapah nami, muda pnrngagan ni pseasug nami qpahun, taxa ka trima hiyi na, taxa ka psramal tqian na, taxa ka psluhay musa ngangut hyaan, ana msriqu bi pkuyun ka tama o ida niqan ka pnsgan qpahan na uri, kmaguh rkrak kika qpahun na, duri ni aji wana nii ka tbyaxun nami, kingal hngkawas pxal musa pbeytaq qumi skbrax qbubur ni kingal idas pxal saun pqarik ubal ni pkeangal tmaqu, saw nii qpahun o aji bi msleexan wa!
Duhi ksun nami tmngahang, pusu kari Duhi o empgeeguy, ma ksun Duhi hug? Niqan ka pusu na hiya, rmngaw ka tama ita seejiq ga knthlangan ni niqan hangan babaw dxgal ka spruun ta, quri pnluban sjiqun o ini tduwa mhmut msaang seejiq yaasa sgdqras ka nii, Duhi ksun ta mlawa ka seejiq o asi bngbing msaang, kiya ni Duhi ksun ta mlawa ka huling o asi sigaw sigaw msa smigaw knan ka ngungu na, spdka ta msaang seejiq ka Duhi o, asi kmalu kuxul ta wa! Ha ha!
Swayi mu snaw o ini bi sruwa tmabug saw nii huling rngayun, tmabug huling bbuyu yaasa tmsamat bi ka hiya, ksngan kuna ni ini pstmay Duhi tmay sapah na, asi ka ulan ngangut,“Huling o aji tbngun ruwan sapah, dsun ta bbuyu tmlibu tmsamat kiya.”msa ka hiya, ana yaa saw kiya msaang knan o ini ku huya, yaasa aji pkla smeuxul lnglungan Duhi ka hiya.
Kuxul nami bi ka Duhi nii, nuxay hiya wada mseupu bi lnglungan qmeepah ka ruwan sapah nami, duri ni lala bi ka wada nami slhayun uri ha, yaasa psmuxul bi lnglungan kska tmbyaxan nami qmeepah ni knsbuq lnglungan nami, ida tmaga rhngun sapah ni smeiyah mnan, ki qatar o ki snegul na uri, saw bi sgealu ni rngayun.
Dmhaw patas samaw pgkla quri kndsan huling ga, yabi saw bitaq maxal aji uri o maxal rima ka hngkwasan huling rngayun nii msa, wada maa rudan tnhiyan nami ka Duhi nii da, maspat hngkawas nii o wada teumal qnaras nami ni qnrqilan nami ka Duhi nii, rahuq hiya ungat ka pdhuq psmuxul lnglungan nami, niqan hiya ka babaw dxgal do manu ka gimun nami duri hug?